રોજ ચાલી નીકળું છું, રોજ થાકી જાઉં છું,
ઊંચકી હોવાપણાનો બોજ થાકી જાઉં છું;

એકધારું જાગવાથી કોઈ દિ' થાક્યો નથી,
સ્વપ્નની આવી ચડે જો ફોજ, થાકી જાઉં છું;

શ્વાસનો દરિયો સમૂળગો પાર ઊતરી જાઉં છું,
હોય પીડાઓનો જ્યારે હોજ, થાકી જાઉં છું;

રોજ કંઈ ને કંઈ મને ના ભાવતું પિરસ્યા કરે!
ઓ પ્રભુ! બદલાવને આ લોજ, થાકી જાઉં છું;

એમણે પૂછ્યું સતત લખતા હો તો થાકો નહિ?
મેં કહ્યું કે ના લખું ને તો જ થાકી જાઉં છું.

: હિમલ પંડ્યા