Friday 18 June 2021

તું છોડ હકીકત બધી, શમણાંની વાત કર
પૂર્વાનુમાન-કલ્પના-ભ્રમણાની વાત કર

વીતી ગઈ જે રાત એ વીતી ગઈ હવે
અત્યારની ને આજની, હમણાંની વાત કર

તારી તરસ ને ઝંખના સમજી જશે બધાં
મૃગજળને દેખી દોડતાં હરણાંની વાત કર!l

ખંજર બન્યાં એ પીઠનું એમાં નવાઈ શી?
ચહેરાં હતાં જ કેટલા નમણાં! - ની વાત કર

ડૂબી ગયાની દોસ્ત! એ ચર્ચામહીં ન પડ
ઓથે રહ્યો'તો જેની એ તરણાંની વાત કર

: હિમલ પંડ્યા


 

दो घड़ी प्यार जताओगे, बहल जाउंगा!
हाथ थोड़ा सा बढ़ा दो, मैं संभल जाउंगा!

अब मुआफिक सा हुआ जा रहा हूं मैं सबसे,
जिस भी सांचे में मुझे ढालोगे, ढल जाउंगा!

गर भरोसा है तो तुम मुझपे भरोसा रक्खो
मैं कोई वक़्त तो नही जो बदल जाउंगा!

ये बुझी राख भी अंगार लिए बैठी है
जरा-सी फूँक लगाओगे तो जल जाउंगा!

है उजाला अभी इस काली सियाही के तले,
ये रात जैसे ही जायेगी, निकल जाउंगा!

ओर ज़्यादा यहां रुकने का इरादा भी नही,
कल ही आया हूं ज़माने में, मैं कल जाउंगा!

: हिमल पंड्या

Wednesday 22 July 2020

આ મજાઓ બે ઘડીની હોય છે,
દર્દની ઉંમર સદીની હોય છે;

એટલે રસ્તા કરી લે છે બધે,
એમની તાસીર નદીની હોય છે;

આપણા ભાગે રકમ મોટી નથી,
એમને ચિંતા વદીની હોય છે;

ભીતરે તું યાદ થઈ વહેતી રહે,
આંખ એ કારણથી ભીની હોય છે;

એ દશા તારા વગર મારી હતી,
જળ વિના જે માછલીની હોય છે;

હું નશામાં કોઇ દિ' હોતો નથી,
હા, અસર દિવાનગીની હોય છે;

ખીંટીએ લટકી રહ્યું હોવાપણું,
એટલી પીડા છબીની હોય છે;

: હિમલ પંડ્યા
એક હસતી, એક ગાતી છોકરી!
ને પવનની જેમ વાતી છોકરી!

એક એ ના હોય તો સૂનું બધું;
એમ મહેફિલમાં છવાતી છોકરી!

વાત માંડે તો ય માંડે એટલી;
કે પછી ના ચૂપ થાતી છોકરી!

યાદમાં સહુની રમ્યા કરતી સતત;
કોઈને પણ ક્યાં ભૂલાતી છોકરી?

આંખ સોંસરવી ઊતરતી જાય ને-
છેક હૈયામાં છપાતી છોકરી!

આ કવિતા કાં અધૂરી લાગતી?
શબ્દમાં પણ ના સમાતી છોકરી!

: હિમલ પંડ્યા

સહજ મળે તે માણું
મોહ, એષણા, લાલચ, મત્સર સઘળું ફોકટ જાણું
સહજ મળે તે માણું

માટીનો આકાર ને એમાં શ્વાસની આવન-જાવન  
પિંડની ફરતે પથરાયેલા જાણે કૈં વનરાવન!
ભેદ ભરમથી અળગો થઈને ભીતર તેજ પિછાણું
સહજ મળે તે માણું

અંદરથી ફૂટી નીકળી છે સાવ અનોખી સમજણ
એ જ ઘડીથી છૂટી ગઈ છે વ્યર્થ બધીયે મથામણ
શબદ મળ્યો તો લાગ્યું જાણે આવ્યું અવસરટાણું
સહજ મળે તે માણું

મોહ, એષણા, લાલચ, મત્સર સઘળું ફોકટ જાણું
સહજ મળે તે માણું

: હિમલ પંડ્યા
હાથ જે લાગી ગયું એ શું હતું?
હાથથી સરકી રહ્યું એ શું હતું?

સ્હેજ શરમાયા પછી હળવેકથી
*કાનમાં એણે કહ્યું એ શું હતું?

વાતમાંથી વાત તો નીકળી ઘણી
તોય જે મનમાં રહ્યું એ શું હતું?

એક પણ અક્ષર ઉકેલાયો નહીં
પત્રમાંહે મોકલ્યું એ શું હતું?

આંસુઓના પૂરને ખાળ્યા પછી
પાંપણેથી જે વહ્યું એ શું હતું?

ક્યાં હતી નબળી કદીયે ગ્રહદશા?
તોય આપણને નડ્યું એ શું હતું?

"પાર્થ" સઘળું ખોઈને બેઠા પછી
આખરી ક્ષણમાં જડ્યું એ શું હતું?

: હિમલ પંડ્યા "પાર્થ"

*તરહી મિસરો : કવિશ્રી રાજ લખતરવી
છાતીમાં દુઃખે નહીં તો થાય શું?
કાળજું કંપે નહીં તો થાય શું?

જૂઠ ને જડતા જ ફૂલે-ફાલશે,
સત્ય જો સંપે નહીં તો થાય શું?

માફ કરનારા જ માફી માગશે,
પ્રેમ જો પૂગે નહીં તો થાય શું?

હાથ ઉઠે - તો નવાઈ ક્યાં રહી?
આતમો ઊઠે નહીં તો થાય શું?

હીણપતનો ભાર આ વેંઢારતા
દ્વારિકા ડૂબે નહીં તો થાય શું?

: હિમલ પંડ્યા