જીંદગીને એમ હંફાવી છે મેં!
રોજ થોડી જાતને તાવી છે મેં!

તું મને તડકા વિશે કંઈ પૂછ મા;
ધોમ ધખતી રાત વીતાવી છે મેં!

આ ઉદાસી એટલે રોકાઈ ગઈ!
પ્રેમથી એને ય અપનાવી છે મેં!

પીઠ પાછળ જે ટીકા કરતા રહ્યા;
એમને મોઢે જ સંભળાવી છે મેં!

ઓ વડિલ! કાં આટલાં ગુસ્સે થયાં?
આપને ગીતા જ વંચાવી છે મેં!

ઓળખે છે એ જ ચાહે છે મને;
આ છબી જાતે જ ઉપસાવી છે મેં!

શ્વાસને ધમકાવીને સીધા કર્યા;
આખરી તરકીબ અજમાવી છે મેં!

: હિમલ પંડ્યા