Friday 15 December 2017

જેમના સપના ખરેખર બહુ મજાનાં હોય છે,
આંસુઓ એના જ ભાગે સાવ છાનાં હોય છે;
એમની યાદો અમારે મન ખજાના હોય છે,
ક્યાં ખબર છે એમને આવા દિવાના હોય છે?!
હું પૂછું, હમણાંથી સપને આવ-જા કાં બંધ છે?
એમની પાસે તરત હાજર બહાના હોય છે;
દૂરથી એ છો ને આંજી નાખતું વ્યક્તિત્વ હો!
સ્હેજ ઓરા જાવ ત્યારે સાવ નાના હોય છે;
જે જમાનાને સિફતથી લઇ શકે છે બાનમાં,
જોઈ લો! એવા જ લોકોના જમાના હોય છે.
આ કવિતાઓ લખો એ ખોટનો સોદો નથી,
ને લખે, મોહતાજ એ ક્યારે નફાના હોય છે?
: હિમલ પંડ્યા 

No comments:

Post a Comment