ચાલ, ઊભો થા! લડવું પડશે,
થોડું તો બાખડવું પડશે;
ભીતર સ્હેજ કનડવું પડશે,
પાંપણ પરથી દડવું પડશે;
સામા વ્હેણે તરવું પડશે,
સીધા ઢાળે ચડવું પડશે;
એમ પ્હોંચવું સ્હેલું ક્યાં છે?
પડવું ને આખડવું પડશે;
ટોચ ઉપર તું હોઈશ જ્યારે,
સહુને થોડું કડવું પડશે;
જીવન-નાટકનો હિસ્સો તું!
હસવું પડશે, રડવું પડશે;
જાતમાં ખોવાવાનું તારે,
જાતમાં ખુદને જડવું પડશે;
શ્વાસની રેલને પાટા પરથી,
સમય થયે તો ખડવું પડશે;
: હિમલ પંડ્યા
No comments:
Post a Comment