મોજ હું આકાશે ઉડવાની માણું
દોરી કોને હાથ? કશું ના જાણું
કોણે બાંધ્યા કિન્ના, કોણે ટિચકી દઈ ઉડાડ્યા?
હવા માપસર આપી કોણે સ્થિર કરીને રાખ્યા?
હોઠ ઉપર મૂક્યું લહેરાતું ગાણું
મોજ હું આકાશે ઉડવાની માણું
શીખવી દીધું કોણે આવું થનગનતા રહેવાનું?
દોરીથી અળગાં થઈને પણ મોજેથી વહેવાનું!
જીવન પોતે જાણે અવસરટાણું
મોજ હું આકાશે ઉડવાની માણું
દોરી કોને હાથ? કશું ના જાણું
મોજ હું આકાશે ઉડવાની માણું
: હિમલ પંડ્યા
No comments:
Post a Comment