એક સપનું આવ્યું'તું મારી આંખમાં.
આથમતા સૂરજના અજવાળે આપણે
બેઠા'તા હાથ લઇ હાથમાં;
એક સપનું આવ્યું'તું મારી આંખમાં…
ચપટીભર રોપ્યા'તા બીજ અમે પ્રેમના,
ઉગેલું બ્હાર કશું દેખાયું કેમ ના?
શબ્દો ફગાવ્યા મેં અંતર ઓગાળવા,
આડસમા રાખ્યા તમે પરદાઓ વહેમના;
દુનિયા આખીને મેં મનાવી લીધી
તમે રિસાયા નાનકડી વાતમાં;
એક સપનું આવ્યું'તું મારી આંખમાં…
સંગે વીતાવ્યા'તા દિવસો બે-ચાર,
ઝુરાવે કેટલો આ શમણાનો ભાર!
વિરહની પીડા ના મુજથી સહેવાય,
તારા વિના ક્યાં છે જીવનમાં સાર?
ભીતરમાં સળગેલી જ્વાળાને ઠારવા,
ચાલ, જીવી લઈએ સંગાથમાં;
એક સપનું આવ્યું'તું મારી આંખમાં…
સાંભળીને સાદ મારો દોડીને આવ,
સીમાઓ સઘળી તું તોડીને આવ;
ક્ષણભરને માટે પણ પ્રેમ ને જીવાડવા,
જિદ્દ ને સંકોચ બધું છોડીને આવ;
મૂકીને દુનિયાની પરવા તમામ
જરા મળીએ અંતરના એકાંતમાં;
એક સપનું આવ્યું'તું મારી આંખમાં…
આથમતા સૂરજના અજવાળે આપણે
બેઠા'તા હાથ લઇ હાથમાં;
એક સપનું આવ્યું'તું મારી આંખમાં.
- હિમલ પંડ્યા
No comments:
Post a Comment