ઘણી વેળાં ઘણાંયે વ્રણ નવી આશા જગાડે છે,
ભીતરથી ઊગતી સમજણ નવી આશા જગાડે છે.
નવાં બંધાય એ સગપણ નવી આશા જગાડે છે,
અને જે જાય છે એ જણ નવી આશા જગાડે છે.
બધે નમતું જ જોખીને ય ક્યાં સુખી થવાયું છે?
કદીક "એક બે ને સાડા ત્રણ" નવી આશા જગાડે છે.
કશું હિતકર હતું એમાં - એ અમને આજ સમજાયું!
જે તૂટે છે એ સપનું પણ નવી આશા જગાડે છે.
હવે બંધાઈ છે શ્રદ્ધા, ટકી રહેવાશે એનાથી,
શબદનું આટલું વળગણ નવી આશા જગાડે છે.
ગઝલ રળિયાત છે બેશક ચુનંદા શાયરોથી અહીં,
નવો જે ફાલ છે એ પણ નવી આશા જગાડે છે.
: હિમલ પંડ્યા
No comments:
Post a Comment