આજે થોડું મોડું થઈ ગયેલું
એનાથી ઊઠવામાં!
ટેન્ડર ખુલવાની તારીખ હતી આજ તો!
ફટાફટ ઉપરછલ્લું ન્હાઈને,
સૂટ-બૂટ ઠઠાડીને,
દોટ મૂકી મંદિર ભણી!
હાંફતો, પરસેવો લૂછતો
મંદિરના દરવાજે પહોંચ્યો!
ત્યાં જ એક હાથ લંબાયો...
દયાની અરજ સાથે.
ગુસ્સો તો ઠલવાવાનો જ બાકી રહેલો!
"ચાલ, નીકળ અહીંથી...
માગણ સાલી! શરમ નથી આવતી ભીખ માગતા??"
પેલી સ્તબ્ધ થઈને દૂર ખસી ગઈ!
પૂછી ન શકી....
"તંય હેં સાયબ! તમે આંય શું કરવા?"
: હિમલ પંડ્યા
No comments:
Post a Comment