સમંદર ગળી જાઉં એવું બને!
કાં પાછો વળી જાઉં એવું બને!
હું જાતે બળી જાઉં એવું બને!
અને ઝળહળી જાઉં એવું બને!
બધા શસ્ત્ર મારી કને હો છતાં-
હું ભયથી છળી જાઉં એવું બને!
છું આપત્તિ સામે અડીખમ ઉભો!
છતાંયે ચળી જાઉં એવું બને!
તને શોધવાની મથામણ મહીં,
મને હું મળી જાઉં એવું બને!
મળે હૂંફ જો તારા સાનિધ્યની;
તરત ઓગળી જાઉં એવું બને!
મને હું કશું કામ લાગ્યો નથી;
તને હું ફળી જાઉં એવું બને!
: હિમલ પંડ્યા
No comments:
Post a Comment