તમે જ્યાં જઈને પસ્તાયા, એ રસ્તે ના જશો પાછા,

નથી ત્યાં કોઈ પણ ફાવ્યા, એ રસ્તે ના જશો પાછા.

ઘણાયે ચાંદ-તારાઓ તમે જોયા ને દેખાડ્યા!

ક્યાં એકે હાથમાં આવ્યા? એ રસ્તે ના જશો પાછા.

તમારા કાનમાં એ ઝેર કેવળ ઘોળશે નક્કી,

નથી અત્તરના એ ફાયાં, એ રસ્તે ના જશો પાછા.

હુલાવી પીઠમાં ખંજર, મૂકીને દોટ ભાગ્યા’તા,

હશે એ ક્યાંક સંતાયા, એ રસ્તે ના જશો પાછા.

ઘણાંને આંગળી ચિંધી, ઘણાં રસ્તા બતાવ્યા પણ-

પછી જાતે જ અટવાયા, એ રસ્તે ના જશો પાછા.

મજાનો એક માણસ ભીતરેથી માંડ જડ્યો છે,

હવે ખુદની મૂકી માયા એ રસ્તે ના જશો પાછા.

: હિમલ પંડ્યા