નીકળે કમાલ જેવા એકાદ-બે સંબંધો
ઈશ્વરની ચાલ જેવા એકાદ-બે સંબંધો.
સહેલા કરી દે ખમવા સહુ વાર આ સમયના
થઈ જાય ઢાલ જેવા એકાદ-બે સંબંધો.
અજવાળું પાથરીને મારગ સતત સૂઝાડે
હોયે મશાલ જેવા એકાદ-બે સંબંધો.
તૂટી ગયા પછી પણ ચુભ્યા કરે છે કાયમ
શેળાની ખાલ જેવા એકાદ-બે સંબંધો.
જો ખ્યાલ ના રહે તો લપસી જવું છે સંભવ
કેળાંની છાલ જેવા એકાદ-બે સંબંધો.
લૂછી બતાવે પળમાં પીડાની છાપ સઘળી
હો બસ રૂમાલ જેવા એકાદ-બે સંબંધો.
વર્ષો પછીય સ્મરણો રાખ્યાં છે સાવ તાજાં
જાણે કે કાલ જેવા એકાદ-બે સંબંધો.
: હિમલ પંડ્યા
No comments:
Post a Comment