જામ છે સામે છલોછલ, પી જતાં ના આવડ્યું!

એમનાં થઈને ય એનાં થઈ જતાં ના આવડ્યું.

એક એવી આગ દિલમાં એ રીતે ફેલાઈ ગઈ,

ઠારતાં ના આવડ્યું, સળગી જતાં ના આવડ્યું.

અધવચાળે જે કોઈ અટકી ગયાં - સુખી થયાં,

ને તમોને ઓ ચરણ! થાકી જતાં ના આવડ્યું?!

હું પરાણે સામટી અવહેલના સહેતો રહ્યો,

દોસ્તની મહેફીલ હતી, ઊઠી જતાં ના આવડ્યું.

છેવટે તો આટલું તારણ અમે કાઢી શક્યા,

જીવતા તો આવડ્યું, જીરવી જતાં ના આવડ્યું.

મોત પણ છેટું રહ્યું એ એક કારણથી જ 'પાર્થ'!

બસ, સમયસર શ્વાસને છટકી જતાં ના આવડ્યું.

: હિમલ પંડ્યા