શક્ય છે આખરે એવું બને,
ધારણા ખોટી ઠરે એવું બને!
ભૂલવામાં જેમને સદીઓ વીતે,
એ જ પળમાં સાંભરે એવું બને!
આપણો સંબંધ જર્જર થઈ રહ્યો,
પોપડું એથી ખરે એવું બને!
રોજ ખુલાસો તમે કરતા રહો,
રોજ શંકા પાંગરે એવું બને !
'રામ' લખીએ, પણ ન શ્રધ્ધા હોય તો,
પથ્થરો ના પણ તરે એવું બને!
ભેદ ભીતરના બતાવે આઈનો,
જાતથી માણસ ડરે એવું બને!
શબ્દ આજે શાંત છો ને લાગતો,
એ અચાનક વિફરે એવું બને!
: હિમલ પંડ્યા
No comments:
Post a Comment