હોય શ્રદ્ધા તો બીજું શું જોઈએ ?

દુઃખ વીતેલી ક્ષણનું શાને રોઈએ?

ક્યાંય ઈશ્વર શોધવાનો હોય નહીં,

આપણે જો આપણામાં હોઈએ.

ઠીક દેખાશે અરીસામાં બધું,

સ્હેજ હિંમત કર, તો ભીતર જોઈએ.

આંસુઓની જ્યાં વહે ભાગીરથી,

ત્યાં જરૂરી છે કે પાપો ધોઈએ.

શબ્દોનું સર્જન છે આ - સ્પર્ધા નથી,

પામવાનું શું અને શું ખોઈએ?

એટલી શ્રદ્ધાથી શ્વાસોને ગૂંથ્યા,

જેમ માળામાં ફૂલોને પ્રોઈએ.

સાચવી છે મેં તને જેવી રીતે,

જિંદગી! ક્યાં સાચવી છે કોઈએ ?

: હિમલ પંડ્યા