એક સપનું આંખમાં ઉગાડતાં વર્ષો થયાં

ને પછી એને જ પાછું દાટતાં વર્ષો થયાં.

જે કશું સમજાયું એ સ્વીકારતાં વર્ષો થયાં

જે સ્વીકાર્યું એ બધું અપનાવતાં વર્ષો થયાં.

જિંદગીને શર્ત વિના ચાહવાની હોય છે

આટલી સમજણ ને ડહાપણ આવતાં વર્ષો થયાં.

આંસુઓ, અવહેલના, પીડા, ઉદાસી ને વ્યથા

એ જ રસ્તે એકધારું ચાલતાં વર્ષો થયાં.

એમણે પૂછ્યું, હું તારી જિંદગીમાં હોત તો?

કેમ કહેવું એમને? કે - ધારતાં વર્ષો થયાં.

માછલીની આંખ તો પળવારમાં વિંધી અમે

ત્રાજવે ઊભા રહીને તાકતાં વર્ષો થયાં.

: હિમલ પંડ્યા