દ્વાર જ્યારે ચોતરફ બિડાય છે,
કોક રસ્તો ક્યાંક ખુલ્લો થાય છે;
છૂટતા સંબંધની પરવા ન કર!
જે જવાનું હોય છે એ જાય છે;
સાવ ખુલ્લા મનથી સામે બેસીએ,
આટલું યે કોઈથી ક્યાં થાય છે?
છે તફાવત આપણામાં એટલો,
હું ચડ્યો છીંડે ને તું સંતાય છે;
તક મળ્યે કરતો કળા જે મોરલો!
નગ્ન પાછળથી જુઓ, દેખાય છે;
મન કહો, મોતી કહો કે આઈનો,
સાંધતા તિરાડ તો રહી જાય છે;
રંજ ના કરીએ કસોટી-કાળનો,
એ થકી તો ‘પાર્થ’ સૌ પરખાય છે.
: હિમલ પંડ્યા ‘પાર્થ’
No comments:
Post a Comment