કોઈનો સહવાસ નોખો હોય છે,
એ વખતનો શ્વાસ નોખો હોય છે;
ઓગળે અસ્તિત્વ આખું મીણ થઈ,
સ્પર્શનો અહેસાસ નોખો હોય છે;
આંસુઓના મૂળ ના શોધો તમે,
એમનો ઈતિહાસ નોખો હોય છે;
પોતપોતાની રીતે માપે બધા,
વેદનાનો ક્યાસ નોખો હોય છે;
હાથ સળગે એમ થાઓ લીન તો,
એ પછીનો રાસ નોખો હોય છે
આંગણું મારું ઉજાળ્યું એમણે,
શબ્દનો અજવાસ નોખો હોય છે,
શીખવી દે કેટલું પળવારમાં!
જિંદગીનો તાસ નોખો હોય છે.
: હિમલ પંડ્યા
No comments:
Post a Comment