કેમ પીડાનો કરવો તરજૂમો?
ભીતરમાં ક્યાંક સ્હેજ ખાલીપો ખખડે ત્યાં આંસુ ગંઠાઈ બને ડૂમો!
કેમ પીડાનો કરવો તરજૂમો?
ખિસ્સું આ પેલ્લેથી કાણું હશે તે અમે એક પછી અેક બધું ખોયું!
દર્પણની સામે તો ઊભા'તા એમ છતાં દર્પણ આ ખાલી કાં જોયું?
એકલતા દોડીને આવીને વળગી છે, સ્વીકારો, ભેટો ને ચૂમો!
કેમ પીડાનો કરવો તરજૂમો?
રસ્તા વિચારોના વાળી લીધા ને મેલી પડતી આ સ્મરણોની કેડી,
સમજાવી-ધમકાવી થાળે પાડી'તી એ લાગણીને કોણે છંછેડી?
સપનાનું દ્વાર સાવ સજ્જડ વાખ્યંુ ને તો ય શાને આ પડઘાતી બૂમો?
કેમ પીડાનો કરવો તરજૂમો?
ભીતરમાં ક્યાંક સ્હેજ ખાલીપો ખખડે ત્યાં આંસુ ગંઠાઈ બને ડૂમો!
કેમ પીડાનો કરવો તરજૂમો?
: હિમલ પંડ્યા
No comments:
Post a Comment