સરકી ગયેલ ક્ષણ બીજું તો શું દઈ શકે?
અવઢવભર્યું વલણ બીજું તો શું દઈ શકે?
વીત્યાતણો અફસોસ ને યાદો ઘણી બધી!
કોઈને બાળપણ બીજું તો શું દઈ શકે?
સપનું થઈને રોજ એ આવે, જતું રહે;
ગમતું કોઈક જણ બીજું તો શું દઈ શકે?
આંખોથી ઊભરાઈને વહેતો આ ખાલીપો!
યાદોનું સંક્રમણ બીજું તો શું દઈ શકે?
સુવું પડે છે બાણની શય્યા ઉપર પછી,
લેવાઈ ગ્યેલું પ્રણ બીજું તો શું દઈ શકે?
સઘળી ઉપાધિઓ ને પછી સાવ સમાધિ!
જીવન અને મરણ બીજું તો શું દઈ શકે?
શબ્દો મળ્યા જો 'પાર્થ" તો જીવી ગયા તમે,
આ કાવ્યનું વળગણ બીજું તો શું દઈ શકે?
: હિમલ પંડ્યા
No comments:
Post a Comment