સવળું કશું ન થાતું, અવળું બધું પડે છે,
સમજી નથી શકાતું કઈ ગ્રહદશા નડે છે?!

માગ્યું મળે તો તારો માનું હું પાડ ઈશ્વર!
જે જોઇતું નથી એ મુજને સતત જડે છે;

બે પળ ખુશીની જ્યારે બે ડગલાં દૂર ભાસે,
દુનિયા ય જો પ્રપંચો અહીં નિતનવાં ઘડે છે;

સપનાને સ્હેજ ટોકો, આવી રીતે ન આવે!
તૂટે છે ત્યારે જાણે સઘળું તૂટી પડે છે;

હું જિન્દગીની સાથે કહો કેટલું બગાડું?
એકેક શ્વાસે એનું ઋણ મારા પર ચડે છે!

શીખવું છે "પાર્થ" મારે આંસુ છુપાવી હસતા;
જીવી જતા મજાનું અહીં કોને આવડે છે?

: હિમલ પંડ્યા "પાર્થ"