કૈંક ઈચ્છાઓ અહીં ધરબાઈ ગઈ છે,
જ્યારથી આ જીંદગી પરખાઈ ગઈ છે;
કાયમી રહેવા મળ્યું છે આંખમાંહે;
જો ઉદાસી કેટલી હરખાઈ ગઈ છે!
એક પંખી જેમ તારી યાદ આવી;
ગીત એનું એ ફરીથી ગાઈ ગઈ છે;
ભીતરે તેં ડોકિયું કર્યું જ છે ક્યાં?
તું અમસ્તી બ્હારથી અંજાઈ ગઈ છે!
એટલો ઈશ્વર તણો આભાર માનું,
આકરી હર એક પળ જીરવાઈ ગઈ છે;
આ ગઝલ લખતા જરા જો આવડ્યું તો,
આપણી પીડા બધી સચવાઈ ગઈ છે;
: હિમલ પંડ્યા
૨૫-૯-૨૦૧૬
No comments:
Post a Comment