આમ તો એવું કશું કારણ હતું નહીં,
મન ઉપર કંઈ એટલું ભારણ હતું નહીં;

જિંદગી ફૂલવાડી સમ જીવ્યો હતો એ,
જીવતર એનું જરાયે રણ હતું નહીં;

ભીતરે અવસર ઘણાં ઉજવાયા તો યે,
બારણે એના ભલે તોરણ હતું નહીં;

આમ જુઓ તો સતત સાથે રહયાં, ને-
આમ જુઓ તો કશું સગપણ હતું નહીં;

રેલના પાટા સમી બે જિંદગીઓ,
એકબીજાનું છતાં વળગણ હતું નહીં;

ખુદને ઓળખવામાં એ પાછો પડેલો!
કેમ કે એના ઘરે દર્પણ હતું નહીં;

મોત એણે એટલે વ્હાલું કર્યું'તું;
જિંદગીનું તો બીજું મારણ હતું નહીં.

: હિમલ પંડ્યા