કોઈને કહેવું નથી એવું નથી,
છોડ ને, એમાં પડ્યા જેવું નથી!

ડહોળ આપોઆપ નીચે બેસશે;
આ બધું દેખાય છે તેવું નથી!

એ જ લોકો ન્યાય મારો તોળશે;
આળ માથે એટલે લેવું નથી;

શ્વાસ પણ મરજી મુજબ ના લઇ શકો!
આપણે ત્યાં એક ક્ષણ રે'વું નથી;

હું દબાયેલો છું જે બોજા તળે,
દોસ્તોનો  પ્રેમ છે, દેવું નથી!

મેં હવે મૂકી દીધી એ ધારણા;
આ જગત કેવું હતું, કેવું નથી!

બસ, દિલાસો જાતને આપી દીધો!
જે થયું છે એ થવા દેવું નથી.

: હિમલ પંડ્યા
૨૧-૭-૨૦૧૬