બધી નહિ તો ય થોડી ઈચ્છાઓને બાળવી પડશે,
નવેસરથી અમારે જીંદગી શણગારવી પડશે;

સબંધોમાં પડેલી ગાંઠને ઓગાળવી પડશે!
જે પહેલાં થઈ ચૂકી છે એ ભૂલોને ટાળવી પડશે!

નિયમ અહીંની રમતના સાવ નોખા નીકળી આવ્યાં,
ખબર ન્હોતી અમારે બંધ બાજી ધારવી પડશે!

હવે આપી જ દીધી છે ચુનૌતી તેં ય તો ઈશ્વર!
ગમે કે ના ગમે પણ મારે એ સ્વીકારવી પડશે!

બનીને સાવ બેપરવા જીવી લીધુંં, હવેથી પણ;
બતાવી છે બધાએ એ પરેજી પાળવી પડશે!

હવે કન્ટ્રોલ ને ઓલ્ટર-ડીલીટથી કામ નહિ ચાલે;
મને લાગે છે કે સિસ્ટમને ફોર્મેટ મારવી પડશે!

: હિમલ પંડ્યા
  ૧૩-૦૭-૨૦૧૬