નામ એનું હોઠ પર ધરવાનું છે,
એ કરાવે એટલું કરવાનું છે;

બસ, સમય આવ્યે જરા સરવાનું છે;
ત્યાં સુધી હરવાનું છે, ફરવાનું છે;

રંગ પીળો પાંદડે ધારણ કર્યો!
ઝાડ પરથી છેવટે ખરવાનું છે;

જીંદગીની વ્યાખ્યા આપું તને?
સાવ સામે પાણીએ તરવાનું છે;

એક મોતી આંખથી ટપકી રહ્યું,
સાચવો એને, એ સંઘરવાનું છે;

હારીએ તો હારવાનું ક્યાં કશું?
જીતીએ તો એમને વરવાનું છે;

કૃષ્ણ જેવો સારથિ જો સાંપડે!
ક્યાં કોઈ સંગ્રામથી ડરવાનું છે?!

: હિમલ પંડ્યા
૨૩-૮-૨૦૧૬