સતત અેક અંતર રાખી જીવ્યો છું,
હું ખુદ મારા ભાવિને ભાખી જીવ્યો છું;

ફકત હું પ્રવેશી શક્યો મુજ માંહે,
બધા બારણાંઓને વાખી જીવ્યો છું;

મજાથી જીવનનો દરેક રસ પીધો છે,
ગમા-અણગમાઓને ચાખી જીવ્યો છું;

વહાવી શકે આંસુઓનો સમંદર,
હું આરોપ એવા ય સાંખી જીવ્યો છું;

ગળે મેં લગાડી છે સઘળી વ્યથાને,
ખભે હું મુસીબતને નાખી જીવ્યો છું;

ઊજવવો છે અવસર અલગ મોત કેરો;
ભલે જીંદગી સાવ પાંખી જીવ્યો છું.

: હિમલ પંડ્યા