જાળવીને રાખજો વિશ્વાસને;
શોધવા નીકળો જો કોઈ ખાસને!

આમ ઝાકળ જે રીતે બાઝી પડે;
કૈંક તો થાતું હશે ને ઘાસને!?

ત્યાં લપાયેલું નીકળશે બાળપણ,
ચાલ ખોલી જોઈએ કમ્પાસને!

કેટલું અંદર પછી ખૂંચતું હશે!
જાણ એની હોય છે ક્યાં ફાંસને?

થાય એને પણ અનુભવ બીકનો;
સ્હેજ અંધારે મૂકો અજવાસને!

એ મથે છે રોજ છેડો ફાડવા;
એક બ્હાનું જોઈએ છે શ્વાસને!

તું નહિ હો તો ય દુનિયા ચાલશે;
છોડ ને તારી બધી ડંફાસને!

: હિમલ પંડ્યા
  ૧૪-૭-૨૦૧૬