મૌન પડઘાઓની વચ્ચે ક્યાંક છું,

ક્ષીણ સપનાઓની વચ્ચે ક્યાંક છું;

શાંત ડૂસકાંઓની વચ્ચે ક્યાંક છું,

કેદ ઘટનાઓની વચ્ચે ક્યાંક છું;

મેં સમયની સૌ થપાટોને સહી!

તો ય થડકાઓની વચ્ચે ક્યાંક છું;

જીવતી લાશો જુઓ છો ચોતરફ?!

હું ય મડદાઓની વચ્ચે ક્યાંક છું;

નામ ચર્ચાતું થયું તારું બધે,

હું ય અફવાઓની વચ્ચે ક્યાંક છું;

ક્યાંક છું એવો જ દેખાઈ જતો!

બંધ પરદાઓની વચ્ચે ક્યાંક છું;

છો તખલ્લુસ નીકળ્યું મક્તામાં 'પાર્થ'!

પણ હું મત્લાઓની વચ્ચે ક્યાંક છું.

: હિમલ પંડ્યા 'પાર્થ'