જીવવાની એ જ રીત ખરી જાણતો હતો,
જે અણગમાઓ સઘળા તજી જાણતો હતો
હસતા સહી ગયો'તો પીડાઓના ભારને,
તરકીબ સહુથી સાવ જુદી જાણતો હતો
માણી શક્યો’તો એ જ આ મહેફીલની સૌ મજા,
અહીંયાથી સમયસર જે ઊઠી જાણતો હતો
અંતે ભળી ગયો ને તું ટોળાની વાતમાં!
પણ તું ય હકીકત ક્યાં પૂરી જાણતો હતો?
પાછું વળીને એમણે જોયું હશે નક્કી,
એના હૃદયની સાચી સ્થિતિ જાણતો હતો
મેં એટલે આ માર્ગ કવિતાનો લઈ લીધો!
ક્યાં બંદગીની રીત બીજી જાણતો હતો?
: હિમલ પંડ્યા
No comments:
Post a Comment