ચાલ ને! થોડાં પાછા જઈને આગળ જઈએ,
શો વાંધો એમાં? રહી રહીને આગળ જઈએ;
આપણે કાં આગળ જાવામાં આગળ થાવું?
તું પહેલાં જા - એવું કહીને આગળ જઈએ;
એક જગાએ રહેવામાં છે જોખમ જેવું,
એ કારણથી થોડાં વહીને આગળ જઈએ;
સ્મિત, સહારો, આંસુ, અવઢવ, સ્નેહ, ઉદાસી;
સરવાળે સઘળું લઈ-દઈને આગળ જઈએ;
એણે જે કંઈ દીધું, પ્રેમથી સ્વીકારીને-
અણગમતું હો એ પણ સહીને આગળ જઈએ;
જીવનના રસ્તે ભરવાના શ્વાસના ડગલાં!
મોતની સાવ જ સામા થઈને આગળ જઈએ;
: હિમલ પંડ્યા
No comments:
Post a Comment