એકલી, બસ એકલી કડવાશ લઈ જીવતા હતાં,
જિંદગીમાં એટલે અવકાશ લઈ જીવતા હતાં.
‘કાશ’ને ભૂલીને જેઓ ‘હાશ’ લઈ જીવતા હતાં,
એ જ સાચા અર્થમાં હળવાશ લઈ જીવતા હતાં.
એમણે એકાદ વેળા પણ અહીં જોયું નહીં,
કોણ જાણે આપણે કઈ આશ લઈ જીવતા હતાં!
આ સંબંધો કોઈ પણ મોસમમાં મ્હોરી ક્યાં શક્યાં?
પાંદડે એ કાયમી પીળાશ લઈ જીવતા હતાં.
એક પણ પાનું હુકમનું કોઈ દિ’ નીકળ્યું નહીં!
આ અમે કેવી ક્ષણોની તાશ લઈ જીવતા હતાં?
પ્હોંચતાવેંત જ પૂછાયો પ્રશ્ન એવો સ્વર્ગમાં,
કેટલાં વરસોથી આવી લાશ લઈ જીવતા હતાં?
: હિમલ પંડ્યા
No comments:
Post a Comment