એક છેલ્લા કાફિયાની ખોટ છે,
જિંદગી મક્તા ભણીની દોટ છે.
લ્યો, તમારે હસતા રહેવાનું અને,
ફાકવાનો આ પીડાનો લોટ છે!
એ બહુ ભાગ્યે જ આખી નીકળે,
લાગણી ભાંગ્યું-તૂટ્યું અખરોટ છે.
બ્હાર ફેંકાયાં બધા યે આંસુઓ,
આંખમાંહે સ્વપ્નનો વિસ્ફોટ છે.
નીકળ્યું સરવૈયું એક સંબંધનું,
છેવટે બસ, નહીં નફો નહીં તોટ છે.
આ ગઝલ કહેવાનું કારણ તો હશે,
ક્યાંય એકાદી મજાની ચોટ છે?
: હિમલ પંડ્યા
No comments:
Post a Comment