કો’ક દિ’ એવું ય થાતું હોય છે,
આંસુને પણ પી જવાતું હોય છે;
હાથમાં જે આવતું હોતું નથી,
હાથમાંથી એ ય જાતું હોય છે;
પિંજરે પૂરાઈ છે જેની વ્યથા!
એ ય ક્યાં મરજીથી ગાતું હોય છે?
એક સપનું છે હજી સિક-લીવ પર,
રાતભર એથી જગાતું હોય છે;
હાથ બે જોડી તમે માંગો અહીં,
ત્યાં સુધી ક્યાં સંભળાતું હોય છે?
આંખ એની વાંચતા જો આવડે!
મૌન પણ એનું કળાતું હોય છે;
આ ક્ષણો જે સાથમાં એના વીતે,
એ ક્ષણોમાં બસ, જીવાતું હોય છે;
: હિમલ પંડ્યા
No comments:
Post a Comment