કોણ જાણે શું લખ્યું છે ચોપડે?

કે ખુશીની એક પળ પણ ના જડે!

દર્દને પસવારતા શીખવું પડે,

એમ થોડું સુખ સહુને સાંપડે?

કુંડળી ખોલી, તો એ બોલી ઊઠી,

પૂર્વગ્રહ સિવાય બીજું શું નડે?

રણ સમયનું વિસ્તર્યા કરતું સતત,

આ હરણ ઈચ્છાનું કેવું તરફડે?

આ હકીકતનું છે સમરાંગણ અને-

ત્યાં જુઓ! સપનાંઓની લાશો સડે

છેક ભીતર યાદને ધરબી છતાં,

આંખથી આ એકધારું શું દડે?

જિંદગીથી માંડ સંતાયા હો ને-

મોત તમને શોધતું આવી ચડે!

: હિમલ પંડ્યા